Paul Mizzi, pastor.
Knisja Evangelika Trinitá
Kaxxa Postali 9
Luqa Malta

Joe Mizzi, webmaster.
Mobile 79551446

email

Il-laqghat huma mftuha ghal kullhadd.

Il-Hadd 10:00AM
L-Erbgha 7:30PM

mappa

Merhba mill-qalb fis-sit tal-Knisja Evangelika Trinità.

Kif nistgħu ngħinuk

Il-bieb tal-knisja tagħna, u qlubna, huma dejjem miftuħin beraħ għalik. Ejja u isma’ l-messaġġ ta’ l-evanġelju, u gawdi magħna l-ferħ tas-salvazzjoni fi Kristu, is-Salvatur tad-dinja. Mappa

Bi pjaċir qed nippubblikaw numru sabiħ ta' artikli u kotba online. Jalla issibhom interessanti u ta' barka spiritwali. Kitba Evangelika

Jekk ghandek xi mistqsija dwar is-salvazzjoni jew il-hajja Kristjana, nistednuk tiktbilna. Inweghduk twegiba onesta mill-Iskrittura Mqaddsa. Email

Min aħna

Aħna ġemgħa ta’ Nsara evanġeliċi.

Jgħidulna “evanġeliċi” għax nibnu l-fidi tagħna fuq it-tagħlim ta’ l-Iskrittura biss, u għaliex nafdaw fil-Mulej Ġesù Kristu waħdu għas-salvazzjoni tagħna.

Aħna magħqudin fi knisja biex flimkien inqimu ’l Alla u ngħinu lil xulxin.

Aħna nagħrfu wkoll il-knejjes Kristjani mxerrdin ma’ l-erbat irjieħ tad-dinja. Għalkemm jissemmew b’ismijiet u laqmijiet diversi, il-Kristjani huma lkoll aħwa u familja waħda għax għandna Missier wieħed, Mulej wieħed u Spirtu wieħed.

Il-kap tal-knisja huwa l-Mulej Ġesu' Kristu, u jmexxiha bil-Kelma u l-Ispirtu tiegħu. L-organizzazzjoni tal-knisja hi sempliċi. Il-presbiteri jieħdu ħsiebha skond it-tagħlim ta' l-Iskrittura, filwaqt li kull membru għandu sehem sħiħ x’jagħti għall-ġid ta’ kulħadd.

Il-knisja tagħna hi ċkejkna iżda x-xirka bejnietna hi ħelwa tassew. Fil-laqgħat tagħna nkantaw għanjiet u tifħir ’il-Mulej, nitolbu flimkien, naqraw mill-Bibbja u nisimgħu l-Kelma t’Alla pridkata.

Kull nhar ta’ Ħadd niċċelebraw l-Ewkaristija billi naqsmu bejnietna l-ħobz u l-inbid b’tifkira tas-sagrifiċċju ta’ Kristu għall-maħfra tad-dnubietna. Il-magħmudija ta' membri ġodda hi okkazzjoni ta' ferħ għalina lkoll.

Aħna nistinkaw biex inxandru l-Evanġelju, speċjalment fost il-Maltin u l-Għawdxin. Ma nistgħux ma naqsmux ma’ l-oħrajn l-Bxara t-Tajba li biha ksibna l-paċi m’Alla u l-ferħ li ma jitfissirx bil-kliem.

X'nemmnu

Il-fidi taghna hi mibnija fuq it-taghlim tal-Bibbja biss, il-Kelma t'Alla. Nistqarru l-Kredu ta’ l-Appostli u kredijiet antiki ohra peress li jigbru fihom taghlim ewlieni tal-Bibbja. Fil-qosor:

• Aħna nemmnu fit-Trinità Mqaddsa, Alla wieħed fi tlett Persuni, il-Missier, l-Iben u l-Ispirtu s-Santu.

• Nemmnu f’Ġesù Kristu, l-Iben waħdieni u etern t’Alla, natura waħda mal-Missier, li bih sar kollox.

• Għas-salvazzjoni tagħna l-Iben t’Alla sar bniedem,  twieled mill-verġni Marija, bata u miet fuq is-salib għal dnubietna, mat-tielet jum qam minn bejn l-imwiet, u tela’ s-sema fejn qiegħed isaltan fil-glorja.

• Nemmnu li s-salvazzjoni hi grazzja b’xejn t’Alla, u nirċivuha permezz tal-fidi fi Kristu biss, u mhux bl-opri jew il-merti tagħna.

• Alla sejjħilna għall-qdusija, imħabba, ġustizzja u opri tajba, bl-għajnuna ta' l-Ispirtu s-Santu li jgħammar fina.

• Il-Mulej Ġesù se jerga’ jiġi bis-setgħa u glorja, biex iqajjem il-mejtin kollha, għall-kundanna tal-ħziena fl-Infern, u biex jippremja lill-ġusti u jdaħħalhom fl-hena tal-Ġenna għal dejjem.

Ghal taghrif dettaljat dwar il-fidi u prattika taghna, ara Il-Kostituzzjoni.