Min Aħna

Qabel xejn aħna Kristjani, dixxipli tal-Mulej Ġesù Kristu. Fih nemmnu u lilu rridu nservu. Jgħidulna 'Evanġeliċi' għax nibnu l-fidi tagħna fuq it-tagħlim tal-Iskrittura biss.

Aħna magħqudin fi knisja biex flimkien inqimu ’l Alla u ngħinu lil xulxin.

Nagħrfu wkoll il-knejjes Kristjani mxerrdin mal-erbat irjieħ tad-dinja. Għalkemm jissemmew b’ismijiet u laqmijiet diversi, il-Kristjani huma lkoll aħwa u familja waħda għax għandna Missier wieħed, Mulej wieħed u Spirtu wieħed.

X’Nagħmlu

Fil-laqgħat tagħna nkantaw għanjiet u tifħir ’il-Mulej, nitolbu flimkien, naqraw mill-Bibbja u nisimgħu l-Kelma t’Alla pritkata. Il-knisja tagħna hi ċkejkna iżda x-xirka bejnietna hi ħelwa tassew.

Kull nhar ta’ Ħadd niċċelebraw l-Ikla tal-Mulej billi naqsmu bejnietna l-ħobz u l-inbid b’tifkira tas-sagrifiċċju ta’ Kristu għall-maħfra ta' dnubietna.

Għalina l-fidi Kristjana hi attitudni u impenn għall-ħajja kollha, mhux biss għall-ħin li niltaqgħu l-knisja.

Aħna nistinkaw biex inxandru l-Evanġelju, speċjalment fost il-Maltin u l-Għawdxin. Ma nistgħux ma naqsmux mal-oħrajn l-Bxara t-Tajba li biha ksibna l-paċi m’Alla u l-ferħ li ma jitfissirx bil-kliem.

X'Nemmnu

Aħna nemmnu fit-Trinità Mqaddsa, Alla wieħed fi tlett Persuni, il-Missier, l-Iben u l-Ispirtu s-Santu, kif nistqarru fil-Kredu. Nemmnu f’Ġesù Kristu, l-Iben waħdieni u etern t’Alla, natura waħda mal-Missier, li bih sar kollox.

Għas-salvazzjoni tagħna l-Iben t’Alla sar bniedem u twieled mill-verġni Marija. Ġesù miet għal dnubietna fuq is-salib, qam mill-mewt, u tela’ s-sema fejn qiegħed jidħol għalina u jsaltan fil-glorja.

Nemmnu li s-salvazzjoni hi grazzja b’xejn t’Alla, u nirċivuha permezz tal-fidi fi Kristu, u mhux bil-merti tal-opri tagħna. Alla sejħilna għall-qdusija, imħabba, ġustizzja u opri tajba, bl-għajnuna tal-Ispirtu s-Santu li jgħammar fina.

Il-Mulej Ġesù se jerga’ jiġi bis-setgħa u l-glorja, biex iqajjem il-mejtin kollha, għall-kundanna tal-ħziena fl-Infern, u biex jippremja lill-ġusti u jdaħħalhom fl-hena tal-Ġenna għal dejjem.

AKTAR TAGĦRIF

Għal informazzjoni aktar dettaljata tat-twemmin tagħna, ara l-kostituzzjoni tal-knisja.

Sola Scriptura - Sola Fide

Aħna l-evanġeliċi sikwit nużaw dawn iż-żewġ frażijiet bil-latin biex nesprimu l-konvinzzjoni tagħna fuq l-awtorità unika tal-Iskrittura u fuq il-fidi bħala l-mezz tal-ġustifikazzjoni. Imma x'irridu nfissru eżattament?

Sola Scriptura, l-Iskrittura Biss, hi affermazzjoni li l-Bibbja hi l-Kelma t'Alla miktuba, li tiġbor fija r-rivelazzjoni sħiħa t'Alla għalina, u li għandha l-ogħla awtorità.

Ma tfissirx li l-mexxejja tal-knisja m'għandhomx awtorità wkoll, jew li t-tradizzjoni m'għandha ebda valur, jew li kull tradizzjoni hi ħażina. Lanqas tfisser li kull Kristjan jista' jfisser il-Bibbja kif iffettillu, jew li m'għadux bżonn il-knisja peress li għandu kopja tal-Bibbja f'idejh.

Sola Scriptura tfisser li kulħadd, kull individwu u l-knisja, il-mexxejja u l-membri, għadhom jissottomettu ruħhom għall-awtorità tal-Kelma, biex it-tradizzjonijiet tagħna jkunu jogħġbu 'l Alla u biex minnha nixorbu l-ilma għall-ħajja ta' dejjem, mingħajr ma nikkontaminawh bit-tagħlim u l-filosofija umana.

Sola Fide, Bil-Fidi Biss, hi l-isqarrija li s-salvazzjoni hi grazzja b'xejn t'Alla, u li nirċevuha bil-fidi, u mhux bi ħlas għall-opri jew mertu tagħna.

Ma tfissirx li kull min jgħid li jemmen, u li ħajtu hi xotta u bla frott, hu tassew salvat, jew li fidi mejta tista' qatt issalva lil xi ħadd.

Imma Sola Fide tfisser li aħna ħatja, bla fejda, u li l-unika fiduċja tagħna biex inkunu meqjusin ġusti quddiem Alla huwa biss Ġesù Kristu u d-demm li xerred għalina.